س سؤال

س سؤال يا سِت ماما :-

مغرقاني بودرة تلك و برفانات ليه ...؟؟!!

أنا أصلاً من غير حاجة ريحتي حلوة لإن معنديش غُدد عرقية زيكم إنتم الكُبار .. غير إن بودرة التلك بأي نوع ممكن على المدى الطويل تسببلي حساسية على صدري و البرفانات الكتير بتخلليني مش عارف أشم ريحتك و دا بيقلب مزاجي و بيضايقني كمان ممكن تسببلي حساسية جيوب أنفيه .. من فضلك تكتفي بالشاور و هدومي تكون نظيفة غير كده أنا مش محتاج حاجه 😎

س سؤال تاني يا أمي :-

بتشيلي إيدي من بُقي ليه .... بتضايقيني ليه .... أنا ضايقتك في حاجه يا ستي ؟؟!! 

أقوى خلايا حسية عندي و أنا صغير بتكون في الفم و بتكون أقوى كمان من الخلايا اللي في أطرافي ... علشان كده باستخدم فمي في الإستكشاف و كل حاجه هحطها في بقي لِعب ... إيدي ... رجلي ...أنا حر يا ناس 

كُل اللي عليكي تبعدي عني الحاجات الصغيرة علشان ما تسببليش إختناق لا قدر الله .... و لو ...لو ... لو.... إستمريت في مص صوابعي لِعُمر ٣ سنوات إبقى إبدأي دوري على حل ... أظن مفيش أسهل من كده 😎

س سؤال تاني يا ماما يا مجنناني :-

مِش بتقصي أظافري بإنتظام ليه .... هاه .... ليه ؟؟؟ 

يا مامتي يا حبيبتي أنا ضوافري بتطول أسرع منكم إنتم الكُبار بمعدل الضعف يعني ضافرك لو بيحتاج يطول في إسبوع بيطول عندي في ٣ أيام بس لإن التمثيل الغذائي عندي أسرع ف ياريت تخللي بالك من النقطة دي لإني خرشمت وشي و بقى شكلي شوارِع ..😎

س سؤال لمامتي :-

هو ليه بتضايقي لما بأقرصك و الا بألسوعك و الا بأمسك صوابعك و إنت بترضعيني .... أنا بالطريقة دي بقولك بحبك ... مش بأعرف أتكلم يا ناس و دي طريقتي في التعبير ...إفهموها بأه 😄

س سؤال لوالدتي الحبيبة :-

ليه كُل الجيران يعرفوا إني مسهرك طول الليل .. ليه الفضايح دي ؟؟!! 

أولاً أنا بأنزل من بطنك مش عارف ليل من نهار و دا لإن ساعتي البيولوجية لسه مش شغاله .. كمان المواد اللي جسمي بيفرزها علشان أنام بيبقى إفرازها غير منتظم ... و كل دا بيبدأ يتظبط عند الشهر السادس و بشوية تنظيم منك بإنك تهدي الجو بالليل و تضلمي الدنيا و تساعديني أنام ... هاعرف الليل من النهار و أنام زي الناس .... بس لو ماعملتش كده إستحمليني إبنك بردُه و واجب عليكي 😄😄😄

دا مش سؤال دا طلب من الغالية 😄:-

من فضلك لو فتحتيلي قصة مصورة علشان تقرئيهالي ما تتضايقيش إن إتحمست و بخبط على الصفحات و تزهقي و تقفلي القصة .... أنا في السن الصغير بشوف الصور ثلاثية الأبعاد و ببقى فاكر إني هاقدر أمسكها زي اللعب .... أصبري عليا و كملي قراءة و فرجيني على الصور لإن دا هايساعدني أوسع مداركي و أبقى أذكى و أتطور بسرعة و أنا أوعدك بعد السنة هشوف الصور ثنائية الأبعاد و مع الوقت هاسمع القصة و أنا عاقل 😌😄

نِرجع للأسئلة 🤨....س سؤال للست ماما العزيزة :-

هو لازم خالتو دينا و طنط زينب و أنكل فرحات و أنّا بهيجة يعرفوا إني بريّل و مفاصلي بتطقطق.... لازم ؟؟!! و الله ما لازِم و لا حاجه 😄

أنا بريّل علشان جهازي العصبي لسه ما إكتملش و قدرتي على البلع لسه ضعيفة و بالتالي مش بقدر أبلع كُل اللعاب و دا مش شرط يكون تسنين و لا فطريات ... أنا كِده خلقتي كِده و مع الوقت و بعد عُمر سنة الأمور بتتحسن .... ماشي 😉

نيجي بأه للطقطقة و اللي بتبقى بسبب إن أوتاري بتتزحلق على بعضها يعني حاجه طبيعية في سنّي و لا هي خشونة و لا تٱكل في المفاصل دي حاجات تجيلكم إنتم الكُبار 😜😜

تقلقي بس لو لقيتي مِفصل الفخذ هو اللي بيطقطق و في الحالة دي خالتو دينا و طنط زينب و أنكل فرحات و أنّا بهيجة مش هاينفعوكي 😄😄.... هتختصري و تروحي بيا على دكتور عظام أطفال يطمنك إني معنديش خلع في مِفصل الفخذ ... ألف بعد الشر عليا طبعاً 😌

تعالي هنا ....جاوبتي على أي سؤال من اللي فاتوا و الا شاطرة بس تشتكي مني في كُل المحافِل العائلية .... مش كِده يا حاجه برستيجي إتبعتر خاااالص 🤨🤔

أمهات غريبة و الله 😄😄

منقول عن دكتورة مروة

#Dr_Marwa_at_kids_Zone

********************************************************************

👶اسمعي مني

شوفي بئى يا ست ماما 🤨

👶أول ما بتولد ممكن أقعد إسبوعين تلاته هادي و نايم ... مطلوب من حضرتك تصحيني بأي وسيلة و ترضعيني لإن سُكري ممكن ينزل و دا خطر على حياتي في المرحلة دي بعد الشرعليا 🤨

👶بعد الأسابيع الأولى هتلاقيني بصرخ و أعيط و هلم عليكي الخلق ... معلش تستحمليني الفترة دي أنا لسه جديد و مش متعود على الضوء و الأصوات و درجات الحراره المتغيرة و اللمس و الهدوم كل دا جديد عليا و باخد وقت لغاية ما إتعود يمكن أول ٣ و ٤ شهور و علشان كده هتلاقيني نضيف و راضع و فُلة بس ٱسف مش هبطل صريخ و ما عليكي غير الصبر يا أمي 😏

👶لو هترضعيني طبيعي إعملي حسابك إن الرضاعة حسب الطلب مش شرط كل ساعتين و من فضلك تهتمي بالنظافة الشخصية مش بحب ريحة العرق و ريحة الأكل اللي لازق في الهدوم و كمان مش بحب ريحة البرفانات النفاذة علشان حاسة الشم عندي قوية جداً و الحاجات دي بتخلليني مقريف طول الرضاعة ف ياريت تراعي دا ارجوكي 😌

👶و كمان لو ناوية ترضعيني طبيعي كفاية فنجانين قهوة أو مج نسكافيه في اليوم علشان الحاجات دي بتنزللي في اللبن و بتعصبني ...و ياريت تبعدي عن التوابل الحارة و أي حاجه مشهور عنها إنها بتعمل غازات زي الكرنب و القرنبيط و البروكلي لإن كل دا هاييجي على دماغك في الٱخر 😄

👶لو هترضعيني صناعي نظفي رضعاتي كل ساعتين تلاته على الأقل أول ٣ شهور بعد كده عند الطلب و الرضعة تتعمل بماء مغلي و متبرد و تتقدملي دافيه و لو بحبها بارده مفيش مشكله و الباقي من الرضعه يترمى فورا يا امي و ما تديهوليش تاني لإنه بيبقى إتلوث خلاص من بقايا لعابي😊

👶و ما تنسيش بعد كل رضعة أو رضعة و رضعة تجيبي قطنة مبلولة بماء دافئ و تمسحي تحت دقني و رقبتي من فوق و تحت إبطي و تنشفي الاماكن دي بعد كده بقطنة ناشفه علشان ما تتفاجئيش بالإلتهابات و تسلخات منظرها وحش بالذات لو كنت مكلبظ شوية 😊

👶كمان هدومي من فضلك تغسليها بمواد رائحتها مش نفاذة علشان زي ما قلتلك حاسة الشم عندي قوية و الروائح القوية سواء حلوة أو وحشة بتؤذي جيوبي الأنفية و بتخلليني مش قادر أشم رائحتك اللي متعود عليها و بتحسسني بالأمان و دا بيؤدي بالتالي إلى القريفة و الصراخ المتواصل و كله برده هاييجي على دماغك في الٱخر ...

👶و من فضلك ما تسيبيش البامبرز مليان فترة طويلة على جلدي علشان التسلخات و إغسليلي بماء دافئ كويس و لو سمحتي بلاش أي نوع من أنواع بودرة التلك ذراتها بتدخل في أنفي و ممكن تسبب لي حساسية في الصدر على المدى الطويل ... إستخدمي كريمات الأطفال .. هتستخدمي زيت جونسون إستخدميه على جلدي و هو مبلول بلاش على الجلد الناشف لإنه هاينشفه أكتر 😊

فهمتي و الا أعصرك أطلع منك أمهات صغيره🤣🤣

متى يبدأ طفلي ب

***************************************************************